Heimagisting í Heillandi Umhverfi


Bænir & Brauð er í sjarmerandi húsi á hæðinni við gamla bæinn. Stórbrotið útsýni er til allra átta þar sem  Breiðafjörðurinn er í norðri , í austri blasir kirkjan við og í suðri sést til fjalla. Stykkishólmur er lítið sjávarpláss með langa sögu og einkennist bæjarbragurinn af öllum þeim gömlu húsum sem bæjarbúar hafa lagt metnað í að viðhalda.  Fyrir vikið er bærinn eins og lifandi safn. Í aðeins  örfárra mínútu göngufjarlægð frá gististaðnum er sundlaug með náttúrulega heitu ölkelduvatni, litlar skemmtilegar búðir, höfnin, söfn og golfvöllurinn svo eitthvað sé nefnt.

 

 

 

 

 

Stykkishólmur - Sögur, menning og umhyggja fyrir umhverfinu

Stykkishólmur er  í aðeins tveggja tíma fjarlægð frá Reykjavík og er hentugur áningastaður fyrir þá sem ætla sér lengra með ferjunni. Bærinn er af mörgum talinn einn fallegasti bær á Íslandi. Gömul hús, falleg höfn og einstök náttúrufegurð er það sem einkennir Hólminn.  Þrátt fyrir að bærinn sé lítill þá eru hér þrjú söfn, nokkur gallerí, veitingahús, kaffihús og sundlaug svo fátt eitt sé nefnt. 

Íbúum Stykkishólms er annt um umhverfið og sýna það í verki. Bærinn okkar hefur fengið ýmsar umhverfisviðurkenningar, m.a. umhverfisvottun og vatnið í Stykkishólmi er talið eitt ferskasta vatn í heimi.

Aðbúnaður

Á Bænum og Brauði eru þrjú herbergi með tvöföldum rúmum og á jarðhæð errúmgóð íbúð með sérinngangi búin öllum helstu þægindum.  Í sameiginlegu rými á fyrstu hæð, sem er smekklega innréttað í skandinavískum stíl,  er reiddur fram gómsætur morgunverður þar sem lögð er áhersla á íslenskt lífrænt hráefni. Heimagerð sulta úr íslenskum berjum ásamt heimabökuðu brauði er m.a. það sem boðið er upp á.  

Ókeypis aðgangur er að interneti, frítt kaffi og te, stór verönd til sólbaða og frábær aðstaða til að grilla.  Auk þess er heitur pottur á veröndinni  þar sem er kjörið að slaka á og njóta útsýnisins.